Thursday, January 18, 2007


હરિ ! આવો ને !

આ વસન્ત ખીલે શતપાંખડી , હરિ ! આવો ને ;
આ સૃષ્ટિએ ધરિયા સોહાગ ; હવે તો હરિ ! આવો ને .
આ વિશ્વ વદે છે વધામણી , હરિ ! આવો ને ;
આવી વાંચો અમારા સોભાગ્ય ; હવે તો હરિ ! આવો ને.
આ ચંદરવો કરે ચન્દની , હરિ ! આવો ને ;
વેર્યાં તારલિયાના ફુલ ; હવે તો હરિ ! આવો ને.
પ્રભુ પાથરણાં દઇશ પ્રેમનાં , હરિ ! આવો ને ;
દિલ વારી કરીશ સહુ ડુલ ; હવે તો હરિ ! આવો ને.
આ જળમાં ઉઘડે પોયણાં , હરિ ! આવો ને ;
એવા ઉઘડે હૈયાના ભાવ : હવે તો હરિ ! આવો ને.
આ માથે મયંકનો મણિ તપે , હરિ ! આવો ને ;
એવા આવો જીવનમણિ માવ ! હવે તો હરિ ! આવો ને.
આ ચંદનીભરી છે તળાવડી , હરિ ! આવો ને ;
ફુલડીયે બાંધી પાજ ; હવે તો હરિ ! આવો ને.
આ આસોપાલવને છાંયડે, હરિ ! આવો ને ;
મનમહેરામણ , મહારાજ ! હવે તો હરિ ! આવો ને.
મ્હારે સુની આયુષ્યની શેરીઓ , હરિ ! આવો ને ;
મ્હારે સૂની સૌ જીવનની વાટ ; હવે તો હરિ ! આવો ને.
મ્હારા કાજળ કેરી કુંજમાં , હરિ ! આવો ને ;
મ્હારા આતમસરોવરઘાટ , હવે તો હરિ ! આવો ને.
- કવિશ્રી નાનાલાલ દલપતરામ

4 comments:

વિવેક said...

સુંદર રચના....

આપના બ્લૉગની લિન્ક મારા બ્લોગ ઉપર અપડેટ કરી લીધી છે:


http://vmtailor.com/gujarati-shabd-jagat/

અભિનંદન અને હાર્દિક શુભેચ્છાઓ...


-વિવેક

Neela said...

આ કાવ્ય મેં મારા બ્લોગમાં મૂક્યું છે.

નીલા કડકીઆ

મેઘધનુષ
http://shivshiva.wordpress.com/

Neela said...

આ કાવ્ય મેં મારા બ્લોગમાં મૂક્યું છે.

નીલા કડકીઆ

મેઘધનુષ
http://shivshiva.wordpress.com/

...* Chetu *... said...

બચપણની કવિતા યાદ આવી ગઇ...આભાર..